ڕەنگدانەوەي نۆستالژياي تاكەكەسي لە شيعرەكاني فرووغ فەڕوخزاد و فەرهاد پيرباڵ‌دا

نۆستالۆژيا بە شێوەيەكي سروشتي لاي هەموو مرۆڤێك بووني هەيە، له سادەترين پێناسەدا بۆ چەمكي ناوبراودەتوانين بڵێين: بريتييە لە يادەوەري تاڵ و شيرين لەگەڵ سەردەمێكي دياريكراوي ڕابردوودا بە هەموو پێكهێنەرەكانييەوە، كە دواجار لە فۆڕمي ئازار و ڕەنج و حەسرەت خواردن بۆ ئەو ڕابردووە لە دەستچووە خۆي دەنوێنێ. لە ڕوانگەي هەستكردن بەو ڕاستييەي، كە ئەدەب و دەقە ئەدەبييەكان گونجاوترين كێڵگەن بۆ دەربڕيني سۆزي حەسرەت و غەم و غوربەت، لەو ڕوەوە ئەم لێكۆڵينەوەيە توێژينەوەيەكي بەراوردكارييە تايبەتە بە ڕەنگدانەوەي جۆرەكاني نۆستالۆژيا لە بەرهەمە شيعرييەكاني هەردوو شاعري هاوچەرخي فارس و كورد زمان( فروغ فروخزاد و فەرهاد پيرباڵ)، بەوپێيەي كە هەردوو شاعير زۆرتريني بەرهەمەكانيان ئاوێزانن بە غەم و غوربەت ڕەنج و حەسرەتي گەڕانەوە بۆ ڕابردووي منداڵي و شيوەن بەسەر ڕابردووي تێپەريو دا. ديارە هەڵبژاردني ئەو دوو شاعيرە و بەراورد كردنيان بە شێوەيەكي رَيككەوت و لەيەكچووني سەرپێيي ناوەرۆكي شيعرەكانيانەوە نييە، بەڵكو دەگەڕێتەوە بۆ ئەو هۆگري و كاريگەرييە بەهێزەي فەرهاد پيرباڵ بە ژيان و بەرهەمەكاني فروخزاد، كە لە هەموو ئاستەكاني شيعري فەرهاد دا ڕەنگي داوەتەوە.